Plantun de Prouvènço

Pèr coumpara dos planto d'encò nostre

Limonium echioides & Vicia bithynica

Limonium echioides

Plumbaginaceae

Nom en français : Limonium annuel.

Descripcioun :
Aquesto saladello, la souleto de l'an, trachis dins li tepiero sablouso e secarouso majamen en ribo de mar. Fai uno rouseto de fueio espatulado emé de costo penado. Se recounèis subretout que li "calice" di flour porton de dènt croucudo, ço que se vèi bèn à la cabusso di petalo. L'óuviero èi peréu cubert de pichòti berrugo (fotò). Au contro dis àutri saladello, flouris tre lou mes de mai e quàsi pas l'estiéu.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 15 cm
Fueio : basalo
Tipe bioulougico : Teroufite
Cicle bioulougico : Planto de l'an

Gènre : Limonium
Famiho : Plumbaginaceae

Ordre : Caryophyllales

Coulour de la flour : Roso
Petalo : 5
Ø (o loungour) flour : 2 à 3 mm
Flourido : Printèms

Sòu : Ca
Autour basso e auto : 0 à 200 m
Aparado : Vo
Mai à jun

Liò : Tepiero sablouso - Mar - Sansouiro
Estànci : Mesoumediterran
Couroulougi : Estenoumediterrano
Ref. sc. : Limonium echioides (L.) Mill., 1768

Vesso(-de-Bitinìo)

Vicia bithynica

Fabaceae Leguminosae

Nom en français : Vesce de Bithynie.

Descripcioun :
Aquelo vesso, pulèu grando, porto de flour groupado de uno à tres, di dos coulour (blanco e vióuleto), emé un pecou mai o mens long (1 à 6 cm). Vèn bèn dins li relarg séusous. Li fueio d'en bas an un parèu de fueioun, e mai pèr li fueio d'en aut (2 à 3 parèu emé uno vediho). Li dóusso soun pelouso (de 2,5 à 5 cm). Poudès peréu aluca lis estipulo que dounon d'èr à d'alabardo.

Usanço :
Ramenten qu'èi pas counseia de manja de grano de vesso, que soun empouisounanto e dounon uno malautié néuroulougico, lou latirisme (presènci d'ODAP).